Այսօր` ապրիլի 2-ին, աուտիզմի իրազեկման միջազգային օրն է:
Աուտիզմի իրազեկման միջազգային օրը շատ երկրներում շենքերն ու այլ կառույցները լուսավորում են կապույտ գույնով, որը խորհրդանշում է այն փաստը, որ աուտիզմը ավելի հաճախ է հանդիպում տղա երեխաների մոտ:
Աուտիզմը հաղորդակցման, սոցիալիզացիայի, հարմարվողական վարքագծի և խոսքի զարգացման ծանր խանգարում է, որն արտահայտվում է մինչև 3 տարեկան հասակը: Այն առանձին հիվանդություն չէ: Իրենից ներկայացնում է տարբեր պատճառներից առաջացած և տարբեր կլինիկական դրսևորումներով համախտանիշների ամբողջություն:
Աուտիզմի ժամանակ հիմնականում տուժում են հետևյալ 3 ոլորտները`
- սոցիալական փոխհարաբերություն
- հաղորդակցություն
- վարք
Աուտիզմի հաճախականությունը կազմում է 12:10000, ըստ որում տղաների մոտ 4-5 անգամ ավելի հաճախ է հանդիպում:
Աուտիզմով երեխայի մոտ խանգարվում է շրջապատի մարդկանց հետ շփումը և փոխհարաբերությունների հաստատումը: Նման երեխաները թվում են մեկուսացված, իրականությունից կտրված: Հայացքով չեն շփվում շրջապատի մարդակց հետ, չեն խոսում և չեն խաղում մյուս երեխաների նման: Միաժամանակ ցուցաբերում են ստերիոտիպային վարքագիծ:
Աուտիզմով երեխաների մեծ մասի մոտ առկա է նաև մտավոր հետամնացություն: Որոշ երեխաներ, ճիշտ է` հազվադեպ ունենում են լավ զարգացած առանձին ունակություններ, օրինակ` կատարում են բարդ թվային հաշվարկներ, լուծում են խրթին գլուխկոտրուկներ, ցուցաբերում են զարմանալի հիշուղություն, դրսևորում են մեծ ունակություններ արվեստի և երաժշտության ասպարեզում:
Աուտիզմի համար միանշանակ բուժում գոյություն չունի, սակայն համապատասխան վերականգնողական, կրթական միջամտության շնորհիվ կարելի է մասամբ հաղթահարել խնդիրը`օգնելով հարմարվել միջավայրին, ինքնուրույն լինել, ընկալել արտաքին աշխարհն ու այնտեղ գտնվող մարդկանց:
Ք. Քոքսի անվան Վերականգնողական կենտրոն հաճախում են 10 երեխա զարգացման պերվազիվ խանգարումներով` աուտիզմով:
Վերականգնողական ծառայությունները մատուցվում են բազմամասնագիտական թիմի անդամների համագործակցության շնորհիվ: Անձնակազմի առանձնահատուկ վերաբերմունքը երեխաների և նրանց ծնողների նկատմամբ, ընդհանուր բարյացակամ մթնոլորտը առավել արդյունավետ են դարձնում վերականգնողական բուժումը:
Նման երեխաների վաղ հայտնաբերումը, գնահատումը և վաղ միջամտությունը, համապատասխան խնամքը, բժշկասոցիալական վերականգնումը, ինչպես նաև նրանց և ծնողների կրթումը լավագույն նախապայմաններն են` երեխաների սոցիալական ինտեգրումն ու բարեկեցությունն ապահովելու համար: