Մարտի 21-ը որպես Դաունի համախտանիշի օր ընտրված է ոչ պատահաբար, այն սիմվոլիկ նշանակություն ունի: Դաունի հիվանդություն ունեցող մարդկանց մոտ 21-րդ քրոմոսոմը 3 հատով է հանդես գալիս, հենց այդ տեղից էլ որոշվել է` երրորդ ամսի 21-րդ օրը համարել Դաունի համախտանիշի օր: Դաունի համախտանիշը առաջին անգամ նկարագրել է անգլիացի բժիշկ Լենգդոն Դաունը 1866 թվականին, ում պատվին էլ այն անվանվել է։
Դաունի համախտանիշ ունեցող անձանց բնորոշ հատկություններից են՝ մկանների թույլ զարգացվածությունը, ցածր հասակը, աչքերի դեպի վեր թեքվածությունը և ձեռքի ափի կենտրոնում խոր գծի առկայությունը:
Դաունի համախտանիշ ունեցող երեխաներին պետք է սովորեցնել ինքնուրույն կյանք վարելուն և բացառել որևէ տեսակի մեկուսացումը : Նման երեխաները տաղանդավոր են , շատ բարի ու նրբազգաց: Արև երեխաները անմիջապես զգում են իրենց հանդեպ ունեցած անկեղծ վերաբերմունքը և չեն ընդունում կեղծիքը:
Քերոլայն Քոքսի անվան վերականգնողական կենտրոն հաճախում են տարբեր ախտորոշումներ ունեցող երեխաներ, որոնց թվում են նաև Դաունի համախտանիշ ունեցող երեխաները: Նրանց հետ աշխատում են վերականգնողական կենտրոնի տարբեր մասնագետներ` վերականգնող թերապիստներ, հոգեբաններ, լոգոպեդներ, մանկավարժներ: Նրանք ընգրկված են նաև արվեստի դասընթացներին` կավագործություն, նկարչություն և սպորտ: Հաճախակի են կազմակերպվում այցելություններ հանրային վայրեր, խաղասրահներ, որի հիմնական նպատակն է երեխաների ինտեգրումը հասարակության հետ, և հասարակությանը իրազեկ պահելը նման առանձնահատհություններ ունեցող երեխաների գոյության մասին:
Համապատասխան մասնագետների և ընտանիքի աջակցության շնորհիվ նրանք կարող են սովորել քայլել և խոսել, գրել և կարդալ, նկարել և սպորտով զբաղվել, հետաքրքրություններ ունենալ, դպրոց գնալ ,մի խոսքով՝ կարող են անել այն, ինչ կարողանում է անել ցանկացած երեխա։ Երեխան պետք է շփվի հնարավորինս շատ մարդկանց հետ և դա պետք է կատարվի առաջին հերթին մանկապարտեզի և դպրոցի միջոցով: Սա այն ուղին է, որը կնպաստի Դաունի ախտորոշում ունեցող երեխայի անձի զարգացմանը և հասարակական կյանքին ինտեգրմանը: