ՄԱԿ-ի Գլխավոր ասամբլեայի որոշմամբ 2008թ․-ից ապրիլի 2-ը ամբողջ աշխարհում նշվում է, որպես Աուտիզմի իրազեկման համաշխարհային օր: Աուտիզմը զարգացման նյարդաբանական բարդ խանգարում է, որն ազդում է ուղեղի նորմալ աշխատանքի վրա` խոչընդոտելով սոցիալական հարաբերություններն ու հաղորդակցման հմտությունների զարգացումը: Այն դասվում է 20-րդ դարի չբացահայտված հիվանդությունների շարքին:
2017թ մայիսի 2-ին Հովհարդ Կարագյոզյան ԲԲՀԿ, Ջինիշյան հիշատակի հիմնադրամի, Արցախի Հանրապետության կառավարության և Քերոլայն Քոքսի անվան վերականգնողական կենտրոնի համատեղ ջանքերով Արցախում բացվեց Քերոլայն Քոքսի անվան վերականգնողական կենտրոնին կից գործող Աուտիզմի ցերեկային խնամքի և բուժման կենտրոնը։ Կենտրոնը իր ծառայություններն է մատուցում և ապահովում տարեկան շուրջ 72 և ավելի երեխաների կյանքի որակը բարելավելու գործընթացում: Այն իրականացվում է մասնագետների հավաքական ուժերի միախմբման միջոցով՝ բժշկի , հատուկ մանկավարժի, հոգեբանի, լոգոպեդի, դայակի, ֆիզիոթերապիստի, էրգոթերապիստի և սոցիալական աշխատողի անմիջական մասնակցությամբ:
Այս օրը հարմար առիթ է մեկ անգամ ևս հանրությանը իրազեկելու , որ մեր կողքին մեզ հետ ապրում են աուտիզմ ախտորոշում ունեցող անձիք, ովքեր կարիք ունեն ուշադրության և սիրո։
Օրվա խորհուրդը հենց կայանում է նրանում , որ բոլորս հասկանանք և ընդունենք, որ աուտիզմ ունեցող մարդիկ ապրում են ուրիշ՝ առավել բարի աշխարհում։ Նրանք սեր են նվիրում ու ցանկանում սեր ստանալ։ Մեր սերը, շատ բան կփոխի աուտիզմ ունեցող մարդկանց կյանքում․․․